غزني ولایت کې د بهائي کانال پروژه د نږدې څلور میلیونه افغانیو په لګښت بشپړه شوه
د غزني ولایت د اجرستان ولسوالي په عباس خېلو سیمه کې د بهائي کانال پروژه د ۳ میلیونه، ۸۱۲ زره او ۵۶۹ افغانیو په لګښت بشپړه شوه.
په دغه پروژه کې د نوموړي کانال هغه برخه چې اوبه ورڅخه ضایع کېدې د ۲۵۰ متره په اوږدوالي سره په بنسټیز ډول جوړه شوه.
د نوموړې پروژې چارې د اوبو او انرژي وزارت له پراختیایي بودجې څخه د غزني د اوبو او انرژي ریاست تر څارنې لاندې پرمخ وړل کېدې، چې د چارو په بشپړېدو سره به یې ۲۵۰ هکتاره کرنیزه ځمکه خړوبه شي.
