غزني ولایت کې د کامل کانال د رغولو چارې پیل شوې
کامل کانال چې د سلطان بند له لویو کانالونو څخه ګڼل کېږي، د نوموړي کانال د رغولو چارې د غزني والي، الحاج حافظ محمد آمین عمري؛ د غزني ولاړو اوبو فرعي سییندیزې حوزې رئیس مولوي محمد شفیق منصور عمر، د غزني ولایت د اقتصاد رئیس مولوي نادرشاه شریف، د نوموړې سیندیزې حوزې تخنیکي ټیم او یو شمېر قومي مشرانو په شتون کې پرانیستل شوې.
نوموړی کانال چې شاوخوا ۱۵ کېلو متره اوږدوالی لري، په ذکر شوي اوږدوالي کې یې ۱۱۸۰ متره په اوږدو سره د اېف، اې، او مؤسسې په مالي ملاتړ د یادې سیندیزې حوزې ریاست تر څارنې لاندې د ۱۰۶ زرو ۲۴۴ امریکايي ډالرو په لګښت جوړېږي.
د یادولو وړ ده چې د یاد کانال په جوړېدو سره به ۱۰۰۰ هکتاره ځمکه له سلطان بند څخه خړوبه شي، ۱۲ پلچکونه او ۱۵ هایدرولېکي دروازې به هم جوړې شي.
همدارنګه د نوموړې کانال د رغولو په چارو کې به ۴۵ کسانو ته د کار زمینه برابره شي او د ۶ میاشتو په موده کې به یې چارې بشپړې او ګټې اخیستنې ته وسپارل شي.
