غور ولایت کې د دوه چکډمونو د جوړولو چارې د څه باندې شپږ میلیونه افغانیو په لګښت پرانیستل شوې
د غور ولایت په فېروز کوه ولسوالي کې د پیلوي سرخ چکډم او په لعل و سرځنګل ولسوالي کې تمبر ممبرتو چکډم د جوړولو چارې د غور د اوبو او انرژي رئیس محترم الحاج ملا رحمت الله آماني، ددغه ریاست تخنیکي سلاکار او د انجینري خدمتونو آمر او د ګڼ شمېر ځايي مسؤولینو او اوسېدونکو په شتون کې پیل شوې.
ښاغلي آماني د دغه مراسمو په دوام کې، د اوبیزو پروژو د ارزښت د بیانولو سربېره، اوبه ملي سرمایه او الهي آمانت وبالهٔ او د هغو پر ساتنې او ګټورې ګټې اخیستنې یې ډېر ټینګار وکړ. هغه زیاته کړه چې اقلیمي بدلونونو پر سیمه باندې خپلې اغېزې غورځولې دي او د افغانستان اسلامي امارت د هېواد د زېربناوو په برخه کې پانګونې ته ژمن دی.
د دغو پروژو د جوړولو چارې د ۶ میلیونه او ۶۰۶ زره او ۵۵۰ افغانیو په ارزښت د اوبو او انرژي وزارت له پراختیايي بودجې څخه تمویلېږي او د غور ولایت د اوبو او انرژي ریاست تر څارنې لاندې پرمخ وړل کېږي. دغه چکډمونه د سېلابونو د کنټرول او د هغوی د زیانونو د کموالي، د موسمي اوبو د راټولولو او د ځمکې لاندې اوبو د تغذيې په موخه جوړېږي.
د یادونې وړ ده چې د پیلوي سرخ چکډم د ۴۴۸۰ مترمکعبه او د تمبر ممبرتو چکډم د ۸۹۱۲ متر مکعبه اوبو د زېرمه کولو وړتیا درلودونکي دي، چې ۱۳۰۰ کورنۍ به په مستقیمه توګه ور څخه برخمنې شي.
