غور ولایت کې د هریرود سیند او د یوه سټیشن د ټینګښت پروژې چارې د څه باندې څلور میلیونه افغانیو په لګښت پیل شوې
د غور ولایت د دولتیار ولسوالي په شینیه کلي کې د هریرود سیند او د شینیه هایدرولوژي سټیشن د ټینګښت پروژې چارې د ۴ میلیونه، ۳۸۱ زره او ۳۰۹ افغانیو په لګښت د غور د اوبو او انرژي رئيس محترم ملا رحمت الله اماني، قومي مشرانو او د سیمې د یو شمېر اوسېدونکو په شتون کې پیل شوې.
ښاغلي اماني د نوموړو پروژو په پرانیست غونډه کې د اوبو سرچینو د ارزښت په هکله خبرې وکړې او د سیند د حریم او بستر پر ساتنې باندې ټینګار وکړ. هغه زیاته کړه، چې له بده مرغه په تېرو کلونو کې په ډېرو ځایونو کې د سیند حریم غصب شوی چې په سیلابي موسمونو کې د سیند شاوخوا اوسېدونکو ته ډیر تاوانونه اوړي.
دغه پروژې د اوبو او انرژي وزارت په مالي لګښت د غور د اوبو او انرژي ریاست تر څارنې لاندې پلي کېږي، چې په بشپړېدو سره به یې کرنیزې ځمکې، استوګنیز کورونه، ښوونځی، فرعي سړک او د شینیه هایدرولوژي سټيشن د سیلابونو د ویجاړیو له خطرې څخه خوندي شي.
