میدان وردگ ولایت کي د نږدې دوه نیم لکه ډالرو په لګښت د استنادي دېوالونو او کانالونو د جوړولو چارې پيل شوې
د میدان وردګ ولایت د سید آباد ولسوالي په شیخ آباد او تنګي سیمو کې د دوه لکه، اته څلوېښت زره، اووه سوه او دوه وېشت ډالرو په ارزښت د استنادي دېوالونو او کانالونو د جوړولو چارې د اوبو او انرژي وزارت د اوبو معین محترم مجیب الرحمن عمر آخندزاده، ، د میدان وردګ د والي محترم قاري بختیار معاذ، د کابل د سیندیزې حوزې عمومي رئيس محترم انجنیر محمد عارف مومند ، د میدان ښار سیندیزې فرعي حوزې رئيس محترم مولوي عبدالصمد حلیم او یو شمېر نورو سیمه ییزو مسؤلینو ځایي خلکو په شتون کې پيل شوې.
د یادو پروژو د پیل پر مهال، د میدان وردګ والي وویل، چې د امارت مسؤلینو له ولسونو سره د کړو ژمنو څخه یوه مهمه د هېواد بیارغونه ده، چې اوس الحمدالله په ټولو ولایتونو کې پروژې روانې دي او د سید آباد ولسوالي خلکو ته يې ډاډ ورکړ، چې د متوازن پرمختګ په پام کې نیولو سره د ولایت په کچه پروژې پلي کېږي او له ولسونو یې وغوښتل چې د امارت له مسؤلینو سره د بیارغونې په برخه کې همکار پاتې شي.
د یادو پروژو چارې د خوړو نړیوال سازمان په مالي ملاتړ د میدان ښار سیندیزې حوزې تر څارنې لاندې پرمخ وړل کېږي.
