>هر څه د شریعت په تله کې» تر سرلیک لاندې د دعوت او ارشاد روزنیز او اصلاحي سمینار ترسره شو
دغه سمینار د اوبو او انرژي وزارت د عمومي غونډو په تالار کې د اوبو او انرژي وزارت د دعوت او ارشاد رئيس محترم مولوي ګل رحمن عارف په شتون کې د دغه وزارت د ګڼ شمېر کارمندانو په ګډون ترسره شو.
په دغه سمینار کې، د اوبو او انرژي وزارت د دعوت او ارشاد رئيس د شریعت له احکامو سره سم د کړنو د ترسره کولو په هکله خبرې وکړې او ټینګار یې وکړ، چې هغه وخت د انسان کړنې د بنسټیز ارزښت درلودونکي دي چې یوازې او یوازې د خدایﷻ د خوښۍ په موخه ترسره شي.
هغه همدارنګه په خپلو خبرو کې وویل چې اخروي ژوند له دنیوي ژوند څخه مهم دی او اړینه ده چې هر انسان په شپه او ورځ کې د خپل اخروي ژوند لپاره یو کره وخت وټاکي او په دې ټاکل شوې وخت کې خپلې کړنې محاسبه کړي.
ښاغلي مولوي عارف د دغو سمینارونو د ترسره کولو موخه د کارمندانو د دیني او معنوي وړتیا لوړونه وبلله او ټینګار یې وکړ، چې د بشر د دنیوي او اخروي ژوند د بریا لاره یوازې د دیني احکامو زده کړه او پرې عمل دی.
د یادونې وړ ده، چې دغه روزنیز او اصلاحي سمینارونه په اونۍ کې یو ځل د دعوت او ارشاد ریاست له لوري د اوبو او انرژي په وزارت کې ترسره کېږي.
