په خوست ولایت کې د سوري پاڼ کانال د جوړولو چارې د 132223 امریکایې ډالرو په ارزښت پرانیستل شوې
د خوست ولایت د صبریو ولسوالي اړوند د سوري پاڼ کانال د جوړولو چارې د یو سلو دوه دیرش زره دوه سوه درویشت(132223) امریکایې ډالرو په ارزښت د شمل خرم سیندیزې فرعي حوزې رئیس محترم مولوي عبدالقیوم ثابت او ورسره مل تخنیکي ټیم، د صبریو ولسوالي ولسوال محترم عبدالولي سعید، په خوست ولایت کې د اړیکو د دفتر رئیس محترم محمد علي ځدران او یو شمیر نورو سیمه ییزو مسئولینو او مخورو په شتون کې پرانیستل شوې.
د نوموړي کانال د جوړولو چارې د 1250 مترو په اوږدوالي، د 80 سانتي مترو سور او 60 ساتني مترو په لوړوالي سره د سویس هېواد د پرمختیایې مرستو ادارې په مالي ملاتړ، د شمل خرم سیندیزې فرعي حوزې په تخنیکي همکاري، د اړیکو دفتر له لوري پرمخ وړل کېږي.
د یادونې وړ ده، چې د نوموړي کانال د چارو په بشپړېدو سره به 1200 کورنۍ په مستقیمه توګه ترې ګټه واخلي او 3340 جریبه کرنیزې ځمکې به هم خړوبې شي.
