په غور ولایت کې د چکډمونو دوه پروژې د نږدې پنځه میلیونه افغانیو په ارزښت ګټې اخیستنې ته وسپارل شوې
د غور ولایت په الفاروق او ساغر ولسوالیو کې د مونیار او جرتلاوق چکډمونو پروژې د څلور میلیونه، نهه سوه، نهه څلوېښت زره، شپږ سوه او نولس(4949619) افغانیو په ارزښت د غور سیندیزې فرعي حوزې د رئيس محترم ملا رحمت الله اماني، د ولایت مقام د استازي، د الفاروق او ساغر ولسوالیو د مسؤلینو او د سیمې د ځایي اوسیدونکو په شتون کې ګټې اخیستنې ته وسپارل شوې.
د غور سیندیزې فرعي حوزې رئيس د نوموړو چکډمونو ګټې ته د سپارلو په غونډه کې د هغوی د ارزښت په هکله خبرې وکړې او اوبه یې د ژوند اړینه ماده وبلله او پر عادلانه ګټې اخیستنې باندې ټینګار وکړ.
نوموړي چکډمونونه د اوبو او انرژي وزارت له پراختیایي بودجې څخه په نوموړو ولسوالیو کې د سیلابونو د کنټرول، د موسمي اوبو د راټولولو او د ځمکې لاندې اوبو د تغذیې په موخه پلي شوې چې د 3185.81 متر مکعب اوبو د زېرمه کولو وړتیا لري.
