په فراه ولایت کې د بخش آباد بند د انحرافي تونلونو پروژه پرانیستل شوه
په فراه ولایت کې د بخش آباد بند د انحرافي تونلونو پروژه د افغانستان اسلامي امارت د ریاست الوزرا اقتصادي مرستیال محترم الحاج ملا عبدالغني برادر، د اوبو او انرژي وزارت سرپرست وزیر محترم ملا عبداللطیف منصور، د اطلاعاتو او کلتور وزارت نشراتي معین محترم مولوي حیات الله مهاجر فراهي، د فراه مرستیال والي محترم مولوي عبدالکریم جهادیار او یو شمېر نورو مسؤلینو په شتون کې پرانیستل شوه.
د یادې پروژې په پرانیست غونډه کې د ریاست الوزرا اقتصادي مرستیال، د بخش آباد بند پروژه د فراه ولایت دخلکو لپاره مهمه او حیاتي وګڼله او ویې ویل چې مونږ په خپل ټول توان د دغې پروژې په بشپړولو کې د فراه ولایت د خلکو ترڅنګ ولاړ یو.
د ریاست الوزرا اقتصادي مرستیال په دې غونډه کې وویل چې د بخش آباد بند د پاتو چارو د بشپړولو په برخه کې به له شته امکاناتو څخه ګټه واخلو او له قراردادي شرکت څخه یې وغوښتل چې په اخلاص او امانتدارۍ سره ورسپارل شوې چارې بشپړې کړي.
په ورته مهال، د اوبو او انرژي وزارت سرپرست وزیر محترم ملا عبداللطف منصور د بخش آباد بند د انحرافي تونلونو د پروژې په پرانیست غوڼده کې وویل چې د فراه ولایت د خلکو ستونزو ته په کتو، نوموړي پروژې ته مو لومړیتوب ورکړ. هغه زیاته کړه چې د بخش آباد بند په جوړېدو سره به په فراه ولایت کې کرنیز فعالیتونه لا پياوړي او ستره اقتصادي وده به رامنځته شي.
د اوبو او انرژي وزارت سرپرست وزیر د یادې پروژې په پرانیست غونډه کې وویل، چې زمونږ کار یوازې په خبرو نه، بلکې په عمل کې ده او نن د دې سترې پروژې پرانیسته یې یوه بیلګه ده.
ټاکل شوې ده چې ياده پروژه په نېږدې راتلونکي کې ګټې اخيستنې ته وسپارل شي.
