په ننګرهار ولایت کې د انرژي ولایتي کمېټې لومړنۍ ناسته ترسره شوه
په ننګرهار ولایت کې د دغه ولایت د اوبو او انرژي ریاست تر چتر لاندې د ختیځ زون انرژي د تنظیم امریت له لوري په ننګرهار ولایت کې د بېلابېلو وزارتونو د سکټورونو د مسؤولینو په ګډون د انرژي ولایتي کمېټه جوړه شوه او لومړنۍ ناسته یې د ننګرهار ولایت د مقام د غونډو په تالار کې ترسره شوه.
په دغه ناسته کې، د ننګرهار مرستیال والي ددغې کمېټې د ارزښت په تړاو خبرې وکړې او زیاته یې کړه چې نوموړې کمېټه د ملي پرمختګ او اقتصادي ودې لپاره یوه ستره هڅه ده او هغه د کمېټې غړو ته د پوره همکاري ډاډ هم ورکړ.
همدارنګه د ختیځ زون د انرژي د تنظیم امر د نوموړې کمېټې د دندو، مسؤولیتونو او صلاحیتونو په هکله بشپړ معلومات وړاندې کړل.
د یادولو وړ ده چې په دغه ناسته کې د طرزالعمل سره سم د ننګرهار د اوبو او انرژي رئیس الحاج سید فضل احد هاشمي د ددغې کمېټې د رئیس په توګه وټاکل شو او د کمېټې سکرټریت به د ختیځ زون د انرژي د تنظیم امریت له لوري مخ ته وړل کېږي.
