په پکتیا ولایت کې د 115528 امریکایې ډالرو په ارزښت د درک کانال او سربند د جوړولو پروژه ګټې اخیستنې ته وسپارل شوه
د نوموړې پروژې د ګټې اخیستنې مراسم د پکتیا ولایت مرستیال والي الحاج شیخ انعام الله صلاح الدین، د پکتيا سينديزې فرعي حوزې رئيس الحاج مولوي محمد کريم فاتح، د پکتیا ولایت د اقتصاد رئيس مولوي محمد انور راشد، د سید کرم ولسوالي ولسوال الحاج قاري علي محمد مجاهد، د اړيکو دفتر ولايتي مسئول انجنير شريف الله ايوبي او یو شمیر نورو سيمه ييزو مسئولینو او قومي مشرانو په شتون کې ترسره شوه.
نوموړې پروژه د پکتیا ولایت د سید کرم ولسوالي په کوه سين کلي کې د یو سلو پنځلس زره پنځه سوه اته ویشت(115528) امریکایې ډالرو په ارزښت د سویس پراختیایې همکاریو ادارې په مالي ملاتړ، د اړیکو دفتر په تخنیکي همکاري او د پکتیا سیندیزې فرعي حوزې تر څارنې لاندې ترسره شوه.
د یادونې وړ ده، چې په نوموړې پروژې کې د 17.6 مترو په اوږدوالي، د 10.4 مترو سور او د 4.4 مترو په ژوروالي سره د درک سربند او د نوموړې سربند دواړو لورو ته د 146 مترو په اوږوالي د استنادي دېوالونو او د 118 مترو په اوږدوالي د درک کانال جوړول شامل دي، چې زرګونه جریبه کرنیزې ځمکې به خړوبې او د سیلابونو له ګواښ څخه خوندي شي.
