یو شمېر افغان او ایراني پانګوال له پنجشیر سیند څخه کابل ته د اوبو د لېږد په پروژه باندې پانګونې ته لېواله دي
د اوبو او انرژي وزارت سرپرست وزیر ښاغلي ملا عبداللطیف منصور د خپل کار په دفتر کې له یو شمېر افغان او ایراني پانګوالو سره وکتل.
په دغه لیدنه کې، یادو پانګوالو له پنجشیر سیند څخه کابل ته د اوبو د لېږد په پروژه باندې د خپلې پانګونې لېوالیتا څرګنده کړه.
د اوبو او انرژي وزارت سرپرست وزیر د افغان او ایراني پانګوالو له لېوالتیا چې له پنجشیر سیند څخه کابل ته د اوبو د لېږد په پروژه باندې پانګونه کوي، هر کلی وکړ او زیاته يې کړه" مونږ هغو ټولو کورنیو او بهرنیو پانګوالو ته چې له پنجشیر سیند څخه کابل ته د اوبو د لېږد په پروژه باندې د پانګونې لېوالتیا غوښتونکي دي، د پانګونې زمینه چمتو کوو. "
د اوبو او انرژي وزارت سرپرست وزیر یادو پانګوالو ته د امنیت ټینګښت او د دې وزارت د قوانینو او تګلارو په چوکاټ کې د هر ډول همکاري ژمنه وکړه.
په دې ناسته کې، د اوبو او انرژي وزارت سرپرست وزیر اړونده ریاستونو ته هدایت ورکړ، چې د یادو شرکتونو او اوبو او انرژي وزارت تخنیکي ټیمونه دې پر تخنیکي مسایلو باندې کار وکړي، ترڅو د هوکړه لیک د لاسلیک کیدو لپاره زمینه چمتو شي.
د یادولو وړ ده، چې تېره ورځ د اوبو او انرژي وزارت سرپرست وزیر د یوه مطبوعاتي کنفرانس په ترڅ کې چې د حکومت د رسنیو په مرکز کې جوړ شوی و، او د وزارت د کړنو او لاسته راوړنو په هکله یې خبرې کولې له پنجشیر سیند څخه کابل ته د اوبو د لېږد په پروژه باندې د ګڼو ملي او نړیوالو پانګوالو د پانګونې له لېوالتیا څخه هم یادونه وکړه.
