د افغانستان د اوبو او انرژي وزیر د ترکمنستان د انرژي له وزیر سره وکتل
د افغانستان اسلامي امارت د اوبو او انرژي وزیر محترم الحاج ملا عبداللطیف منصور، نن( یکشنبه، د ۱۴۰۴ هـ . ل کال د وږي ۱۶) د دغه وزارت د غونډو په تالار کې د ترکمنستان د انرژي له وزیر محترم آننه ګیلدي سپروف، د "ټاپ " نړیوالې پروژې له رئيس محترم مراد آرتیکوف او په کابل کې مېشت د ترکمنستان له سفیر محترم خواجه عوضوف سره وکتل او خبرې، اترې وکړې.
په دغه ناسته کې، دواړو لورو د افغانستان او ترکمنستان ترمنځ د همکاریو د پراخولو په ځانګړې توګه له ترکمنستان څخه کابل ته د زر مېګاواټه برېښنا لېږد، د برېښنا لېږد "ټاپ 500" پروژې چارو د چټکتیا او د "ټاپي" سترې پروژې د پلي کولو په برخه کې د ګډو همکاریو په هکله بحث او د اندونو تبادله وکړه.
د افغانستان د اوبو او انرژي وزیر په خپلو خبرو کې د دواړو هېوادونو ترمنځ د ښو اړېکو د مخینې یادولو ترڅنګ، د نوموړو پروژو د پلي کولو په برخه کې د اړینو همغږیو او همکاریو د رامنځتهکولو په برخه کې د افغانستان اسلامي امارت د بشپړ چمتووالي او ژمنې باندې ټینګار وکړ او زیاته یې کړه، چې افغانستان د دوو اړخیزو اړیکو او همکاریو د پراخولو په ځانګړې توګه د اوبو او انرژي پراختیایي پروژو په برخه کې ژمن دی.
په دغه لیدنه کې، د ترکمنستان د انرژي وزیر د افغانستان په ختیځو ولایتونو کې د وروستۍ زړهبوږنوونکې زلزلې په تړاو د خپلې خواخوږۍ او غمرازۍ مراتب د اوبو او نرژي وزارت د رهبري مقام ته وړاندې کړل.
هغه د افغانستان همکاریو د ستایلو ترڅنګ، د هوکړې شویو پروژو په پرمخ وړلو کې د ترکمنستان بشپړ چمتووالی څرګند کړ او یادونه یې وکړه، چې د برېښنا لېږد نړیوالې پروژې«ټاپ» ( ترکمنستان ـ افغانستان ـ پاکستان) لومړنۍ چارې په ښه توګه د پرمختګ په حال کې دی. همدارنګه د ترکمنستان د انرژي وزیر د دواړو هېوادونو ترمنځ د اړېکو او همکاریو په پراخولو باندې ټینګار وکړ.
دغه ناسته د افغانستان او ترکمنستان ترمنځ د اړېکو په ټینګولو او رغنده همکاریو پر دوام باندې په ټینګار سره پای ته ورسېده.
