د فراه ولایت د بخش آباد بند د چارو وضعیت څېړلو په موخه د همغږۍ جلسه وشوه
د یاد ولایت د بخش آباد بند د چارو وضعیت څېړلو په موخه د همغږۍ جلسه د اوبو د چارو د تنظیم ملي ادارې عمومي رئيس انجنیر خان محمد تکل لخوا د دغه ولایت د ولس استازو او قومي مشرانو په شتون کې تر سره شوه.
په دغه ناسته کې د بخش آباد بند پروژې د کار عملي چارو په وضعیت او د کار په چټکتیا خبرې وشوې.
د اوبو د چارو د تنظیم ملي ادارې عمومي رئيس د پروژې د ارزښت یادولو تر څنګ د کار په چټکتیا ټينګار وکړ.
په ورته وخت کې د فراه ولایت د ولس استازو د اوبو د چارو د تنظیم ملي ادارې او د قراردادي شرکت مسؤلینو ته ډاډ ورکړ چې د بخش اآباد بند پروژې د کار چټکتیا لپاره هر ډول همکارۍ ته ژمن دي.
د بخش آباد د اوبو لګولو او بريښنا بند به د ٢٧ میګاواته بريښنا تولید ارزښت ولري؛ ۱۳۶۴ میلیونه متره مکعب اوبه به ذخیره کوي او ۶۸ زره هکټاره ځمکه به خړوبوي.
