اوبو او انرژي وزارت د ۷۵ میلیونه ډالرو په ارزښت د انرژي د ۶ مهمو پروژو تړون لاسلیک کړ
د اوبو او انرژي سرپرست وزیر محترم الحاج ملا عبداللطیف منصور په یوې برنامې کې د افغانستان د اسلامي امارت د ریاست الوزرا اقتصادي مرستیال محترم ملا عبدالغني برادر په شتون کې د ۷۵ میلیونه ډالرو په ارزښت د انرژي د ۶ مهمو پروژو تړون د عوفي بهرام د کانونو را ایستلو او پروسس سوداګریز شرکت له مرستیال محترم مولوي نورالله خان سره لاسلیک کړ.
د اوبو او انرژي سرپرست وزیر د دغه تړون د لاسلیکولو پر مهال د دغو پروژو پلي کول په هېواد کې د انرژي سکتور د پراختیا په برخه کې اړین او ارزښتناک وبلل او ویې ویل چې د اوبو او انرژي وزارت ژمن دی چې په راتلونکي کې د اوبو او انرژي په سکتور کې لا ډېرې پروژې پلي کړي.
د یادونې وړ ده، چې دغه ۶ پروژې له خواجه الوان دښتې تر ارغندۍ پورې د ۵۰۰ کیلو ولټ مزي د پاتو چارو بشپړول، د ارغندۍ سب سټیشن د پاتو چارو بشپړول، په تره خېلو سیمه کې د نوي سب سټیشن جوړول، د ۲۳ کیلو مترو په اوږدوالي سره د چمتلې سب سټيشن څخه تر تره خېل سب سټیشن پورې د ۲۲۰ کیلو ولټ د لېږد مزي پلي کول ، د ارغندۍ- کابل سب سټیشن پراختیا او په بت خاک کې د نوي سب سټیشن جوړل شامل دي.
د دې پروژو په پلي کېدو سره به له ترکمنستان څخه افغانستان ته زر میګاواټه نوره برېښنا وارد شي، چې له دې سره به د کابل او ګاونډیو ولایتونو د برېښنا د کموالي ستونزې لویه برخه هواره شي.
