تخار ولایت کې د څلورو کانالونو د تحکیماتو او بیارغونې چارې د نږدې څلورسوه زره ډالرو په لګښت پيل شوې
د تخار ولایت په مرکز تالقان او فرخار ولسوالي کې د شاه روان، ګاومالي، ملک های خطایان او لجده کانالونو د تحکیماتو او بیارغونې چارې د درې سوه او څلور اتیازره (384000) آمریکایي ډالرو په لګښت د تالقان د سیندیزې فرعي حوزې د رئيس محترم سراج الدین وهاج، قومي مشرانو او د سیمې د اوسېدونکو په شتون کې پيل شوې.
په دغه پروژه کې، ۱۵۰۰ متره تحکیمات او د څلورو دهنو ودانۍ شاملې دي، چې د اف، اې، او موسسې په مالي لګښت د تالقان د سیندیزې فرعي حوزې تر څارنې لاندې پلي کېږي.
ټاکل شوې ده، چې د نوموړې پروژې چارې د ۱۱ میاشتو په موده کې بشپړې او ګټې ته په سپارلو سره به یې (110000) جریبه ځمکه خړوبه شي.
