خوست ولایت کې په ټولیزه توګه د څه باندې ۱۸ میلیونه افغانیو په ارزښت د چکډمونو اته پروژې ګټې اخیستنې ته وسپارل شوې
د یادو پروژو د پرانیستو مراسم د خوست ولایت په نادرشاه کوټ ولسوالي کې د اوبو او انرژي سرپرست وزیر محترم الحاج ملا عبداللطیف منصور، د کابل سیندیزې حوزې عمومي رئیس محترم انجنیر حبیب الرحمن حقپال، د خوست سیندیزې فرعي حوزې رئیس محترم مولوي عبدالقیوم ثابت، د خوست ولایت سیمه ییزو مسئولینو او ګڼ شمیر قومي مشرانو په شتون کې ترسره شو.
د اوبو او انرژي سرپرست وزیر د یادو پروژو د پرانیستي پر مهال په ټول هېواد کې د اسلامي نظام حاکمیت یو الهي نعمت وبالهٔ او ټینګار یې وکړ، چې د افغانستان خلک باید ددغه نعمت قدر وکړي؛ ځکه چې ددغه نظام تر چتر لاندې هم امنیت او هم د اقتصادي پرمختګ زمینه چمتو شوې ده.
ښاغلي منصور په خپلو خبرو کې یادونه وکړه، چې په خوست ولایت کې ټولټال ۱۳ پروژې په پام کې نیول شوي، چې له هغې جملې څخه اته پروژې بشپړې شوې، دوې پروژې تر کار لاندې دي او درې نورې پروژې ډیزاین شوې او قرارداد ته چمتو دي.
د یادونې وړ ده، چې دغه پروژې په یاد ولایت کې د خاورې د ورستېدو د مخنیوي، د سیلابونو د خطرونو د کمولو، د باران اوبو د زیرمه کولو او د اوبو سرچینو د پیاوړتیا په موخه پلي کیږي.
ددغو اتو پروژو په پلي کېدو سره څه باندې ۵۳ زره متره مکعب اوبه زیرمه او همدارنګه، په مستقیمه توګه نږدې ۱۰ زره کسانو ته د کار زمینه چمتو شوې ده.
