دو پروژه در ولایت پکتیا به هزینه بیش از 8 میلیون افغانی به بهره برداری سپرده شد
د پکتيا ولايت د روحاني بابا ولسوالي په سیمه کې د ګاويانې او د سید کرم ولسوالي کوز شيجنک کانالونو پروژې د ډبلیو، اېف، پي (خوړو نړيوال پروګرام) مؤسسې په مالي ملاتړ، د هېلتو همکارې مؤسسې په تخنيکي همکاري او د پکتيا سينديزې فرعي حوزې تر څارنې لاندې د 8 میلیونه 750 زره 735 افغانیو په لګښت سره ګټې اخیستنې ته وسپارل شوې.
د نوموړو پروژو په پرانیست غونډه کې د پکتيا سينديزې فرعي حوزې رئيس الحاج مولوي محمد کريم فاتح او ددې رياست تخنيکي ټیم، د پکتیا ولایت مقام استازي مولوی عزیز الله قانت، د هېلتو مؤسسې کارکوونکو، د پکتیا ولایت زراعت استازي قاري نورالله نوري، د روحاني بابا ولسوالي ولسوال مولوي محمد فاروقي، د سید کرم او روحاني بابا ولسوالیو سيمه اييزو چارواکو، علماوو، قومي مشرانو، ځوانانو او د رسنیو استازو ګډون کړی وو.
د نوموړې سينديزې حوزې رئيس څرګنده کړه چې د ګاویانې کانال پروژه ١٠٠٠ متره اوږدوالی لري، له دې کانال څخه ١٢٠٠ هکتاره کرنیزه ځمکه خړوبیدله، چې له بشپړېدو سره به یې ١٢٥٠ هکتاره کرنيزه ځمکه خړوبه شي. د کوز شيجنک کانال پروژه ١٢٠٠ متره اوږدوالی لري، له دې کانال څخه ٣٠٠ هکتاره کرنیزه ځمکه خړوبیدله، چې له بشپړېدو سره به یې ٣٣٠ هکتاره کرنيزه ځمکه خړوبه شي.
همدارنګه د روحاني بابا ولسوالي ولسوال مولوي محمد فاروقي د هېلتو همکارې مؤسسې کړنې او هڅې د هېواد د رغونې په برخه کې وستايلې او د کورنيو او نړيوالو بنسټونو او مؤسساتو څخه یې غوښتنه وکړه چې د هېواد په بيارغونه کې بشپړه ونډه واخلي.
له بلې خوا د اوبو او انرژي وزارت د دعوت او ارشاد ریاست رئیس مولوي ګل الرحمن عارف او ورسره مل پلاوي د پکتیا سیندیزې فرعي حوزې له کارمندانو څخه د دعوت او ارشاد تعلیمي نصاب د درسونو په هکله آزموینه واخیستله.
