د آمو سیند څنډو د ټینګښت رئیس د جوزجان له والي سره وکتل
د آمو سیند څنډو د ټینګښت رئیس محترم مولوي وکیل احمد نقي او ورسره مل د دغه ریاست تخنیکي سلاکار محترم انجنير سيدرحمن ځدراڼ جوزجان ولایت ته د خپل سفر په ترڅ کې د دغه ولایت له والي محترم قاري ګل حیدر شفق سره وکتل او د دغهٔ ریاست د مسؤلیتونو او راتلونکو پلانونو په ځانګړې توګه د آمو سیند د تحکیماتي چارو په تړاو اړین معلومات وړاندې کړل او په دې برخه کې د همکاري غوښتنه وکړه.
په ورته مهال، د جوزجان والي په دغه لیدنه کې د آمو سیند څنډو رئيس ته د بشپړې همکاري ژمنه ورکړه.
همدارنګه، ښاغلي نقي د جوزجان ولایت قرقين او خامياب ولسواليو ته سفر وکړ او د سيمې خلکو، قومي مشرانو او د کلفت تحکیماتو سيمه ایز آمر محترم انجنیر صدیق سره وکتل او وروسته یې د آمو سيند د ویجاړ شوو څنډو څخه ليدنه وکړه.
ټاکل شوې ده، چې په راتلونکو څو ورځو کې د دغه ریاست له لوري د جوزجان ولایت مقام او د سیمې د خلکو په همکاري د سیند چینلونو (څانګو) د بندولو چارې پيل شي، ترڅو سیند خپل اصلي مسیر ته وګرځول شي او د لا ویجاړیو مخنیوی وشي.
