د انرژي معینیت اونېزه تخنیکي غونډه د یاد معینیت د څو پروژو د چارو د څېړلو په موخه ترسره شوه
یاده غونډه د اوبو او انرژي وزارت د انرژي معین ښاغلي ملا محمد عیسی ثاني تر مشري لاندې د دې معینیت د رئیسانو، سلاکارانو او تخنیکي مسئولینو په ګډون ترسره شوه.
په دې غونډه کې، د انرژي سکتور رئیسانو د خپلو کړنو او په ځانګړي ډول د غزني تر کندهار پورې برېښنا شرکت ته د برېښنا مزي لېږد د تسلیمولو د څارنې پروسې او نورو موضوعاتو په اړه چې په مخکینيو غونډو کې یې په اړه پرېکړې شوې وې، راپور ورکړ.
همدارنګه په دې غونډه کې د افغانستان برېښنا شرکت سره د برېښنا د تعرفي د حل او د انرژي معینیت د یو شمېر مهمو اداري موضوعاتو په اړه بحث او د نظر تبادله وشوه.
د انرژي ښاغلي معین د رئیسانو او تخنیکي مسئولینو د راپورونو تر اورېدلو وروسته، د چارو د غوره ترسره کېدو په موخه د اړتیا وړ لارښوونې وکړې.
