د انرژي معینیت د کارمندانو لپاره د معلوماتي ټکنالوژي په برخه کې د وړتیا لوړونې ښوونیزه برنامه ترسره شوه
دغه برنامه د اوبو او انرژي وزارت د مالي او اداري عمومي ریاست تر چتر لاندې د کارکوونکو د چارو ریاست له لوري د دغه وزارت د معلوماتي ټکنالوژي ریاست په همکاري سره د انرژي معینیت د کارمندانو د وړتیا لوړونې او تخنیکي مهارتونو د پراختیا په موخه د معلوماتي ټکنالوژي او سایبري امنیت د لومړنیو مباحثو په برخه کې ترسره شوه.
دغه یو ورځنۍ ښوونیزه برنامه چې د کارکوونکو د چارو ریاست د غونډو په تالار کې ترسره شوه، ګډونوال د معلوماتي ټکنالوژي په برخه کې د کاربردي مفاهیمو او مهارتونو څخه د اغېزمنې ګټې اخیستنې، د رسمي برېښنالیکونو او Outlook برنامې څخه د ګټې اخیستنې، د سایبري امنیت د لومړنيو مباحثو ښوونو او د لومړنیو تخنیکي ستونزو هوارولو له ډولونو سره پېژندګلوي ومونده.
دغه ښوونې د معلوماتي سیسټمونو چارو د غورهوالي او په کاري چاپيریال کې د تخنیکي ننګونو د هوارولو لپاره د کارمندانو د وړتیا لوړونې په موخه په لاره واچول شوه.
د دغه ډول برنامو جوړول د کارمندانو د وړتیا لوړونې او د اوبو او نرژي وزارت د تخنیکي چوپړتیاوو په برخه کې اړین رول لوبوي.
