د اوبو او انرژي وزیر صاحب د انرژي اونۍ نړيوال فورم کې د ګډون لپاره روسي فدراسیون ته په سفر ولاړ.
نن د ١٤٠٤ کال د تلې په ٢١ نیټه د افغانستان د اسلامي امارت د اوبو او انرژي وزیر محترم الحاج ملا عبداللطیف منصور د روسیې د انرژي د اونۍ نړیوال فورم کې د ګډون لپاره د روسیې فدراسیون ته په سفر ولاړ.
د سفر موخه د روسیې د انرژي د اونۍ نړیوال فورم کې د ګډون ترڅنګ، د انرژي او اوبو سکتورونو په برخه کې د متقابلو همکاریو د پراختیا، تجربو د تبادلې، او د افغانستان د انرژي سکتور د وړتیاوو د معرفي کولو لپاره د کوربه او ګډون کوونکو هېوادونو له چارواکو سره د لیدنو ترسره کول دي.
دغه سفر د افغانستان د اوبو او انرژي وزارت لپاره یو مهم ګام بلل کېږي، ځکه د انرژي نړیوال فورم د سیمې او نړۍ د هېوادونو ترمنځ د همکارۍ، پانګونې، او د انرژۍ د پایداره پراختیا په اړه د نظرونو د تبادلې مهم فرصت برابروي.
ان شاء الله د وزیر صاحب دا سفر به د افغانستان د انرژي سکتور د پرمختګ، نړیوالو همکاریو، او د نوو پروژو د جلب په برخه کې مثبتې لاسته راوړنې ولري.
