د اوبو او انرژي سرپرست وزیر د افغانستان د علومومو په اکاډمي کې په یوه علمي- څېړنیز سمینار کې د اوبو سرچینو د مدیریت او د هېواد د اوبیزو سرچینو د غوره ترویج په برخه کې پر ګډې همکاري باندې ټینګار وکړ
د اوبو او انرژي سرپرست وزیر محترم الحاج ملا عبداللطیف منصور په یوه علمي – څېړنیز سمینار کې چې د افغانستان د علومو اکاډمي له لوري د هېواد د اوبیزو سرچینو څخه د سمې ګټې اخستنې لارو چارو څېړنې تر سرلیک لاندې د اسلامي امارت د لوړ پوړو مسؤلینو، علماوو، د پوهنتون استادانو او د اوبو سکټور د متخصصینو په شتون کې ترسره شوی وو، ګډون وکړ.
ښاغلي منصور په دغه سمینار کې په هېواد کې د وروستیو وچکالیو او اقلیمي بدلونونو په پام کې نیولو سره د اوبیزو سرچینو وضعیت ته په اشارې سره ټینګار وکړ، چې په اوسنیو شرایطو کې په افغانستان کې د اوبو مدیریت د ټولو همکاریو ته اړتیا لري او اړتیا ده،چې په دې برخه کې دولتي ادارې، اکاډمیک او علمي بنسټونه او د افغانستان ټول خلک د یو بل څنګ ته د اوبو سرچینو د غوره مدیریت او ورڅخه د غورې ګټې اخیستنې په موخه هڅې وکړي.
ښاغلي منصور د اوبیزو سرچینو څخه د ګټې اخیستنې په موخه د اوبو د پراختیا په برخه کې په هېواد کې د علمي څېړنو په لاره اچول یو ارزښتناک ګام وباله او د افغانستان د علومو اکاډمي د فعالیتونو د ستایلو ترڅنګ له هغوی څخه وغوښتل چې د دغو څېړنو پایلې له اړوندو ادارو سره شریکې کړي.
د یادونې وړ ده، چې د دغې علمي غونډې په دوام کې د مسؤلینو، علماوو او پوهانو له لوري د هېواد د اوبیزو سرچینو د ارزښت په برخه کې ګټورې بیانیې وړاندې شوې او همدارنګه د څېړونکو او متخصصینو له لوري څو علمی – څېړنیز پرزنټیشنونه د اوبو له سرچینو څخه د سمې ګټې اخیستنې په هکله وړاندې شول.
