د اوبو او انرژي سرپرست وزیر د بیات پاور له عمومي رئيس سره په شبرغان کې د ۴۰ میګاواټه پاور پلانټ د قرارداد د غځولو او پراختیا په هکله خبرې وکړې
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د دغه وزارت د دفتر د عمومي رئيس محترم قاري محمد عبدالعزیز عزیز په شتون کې د بیات پاور له عمومي رئيس محترم علي قاسمي او مل پلاوي سره وکتل.
په دغه لیدنه کې ښاغلي قاسمي په شبرغان کې د ۴۰ میګاواټه پاور پلانټ د قرارداد د غځولو او تر ۱۰۰ میګاواټه یې د پراختیا مسئله د اوبو او انرژي له سرپرست وزیر سره شریکه او په دې برخه کې د همکاري غوښتنه وکړه.
په ورته مهال، د اوبو او انرژي سرپرست وزیر په دغه لیدنه کې څرګنده کړه، چې مونږ غواړو افغانستان د برېښنا د تولید په برخه کې پر ځان بسیا او په دې برخه کې خپلو هڅو ته دوام ورکوو.هغه زیاته کړه، چې د شبرغان د ۴۰ میګاواټه پاورپلانټ د قرارداد د غځولو لپاره څلور اړخیزې ناستې ته اړتیا ده، ترڅو دغه مسئله په هر اړخیزه توګه وڅېړل شي.
