د اوبو او انرژي سرپرست وزیر د زولرستان شرکت له مسؤلینو سره وکتل
د اوبو او انرژي سرپرست وزیر محترم ملا عبداللطیف منصور د زولرستان عمومي شرکت رئيس محترم عبدالقدیر بارکزي او د نوموړي شرکت له یو شمېر نورو مسؤلینو سره وکتل او په کندهار ولایت کې یې د ۱۵ مېګاواټه لمریزې برېښنا پروژې د ستونزو د هوارولو په هکله بحث او د اندونو تبادله وکړه.
همدارنګه په یاده لیدنه کې د زولرستان شرکت عمومي رئيس د خپلو فعالیتونو او کړنو په هکله معلومات وړاندې کړل او د اوبو او انرژي له وزارت سره یې د خپلو همکاریو دوام ته لېوالتیا څرګنده کړه.
د اوبو او انرژي سرپرست وزیر د انرژي پروژو د پلي کولو په برخه کې د هغوی د همکاریو د دوام او پراختیا د لېوالتیا څرګندولو ستاینه وکړه او هغوی ته یې ډاډ ورکړ، چې د هغوی د ستونزو د هوارولو په برخه کې به هم اړینې پلټنې ترسره شي.
