د اوبو او انرژي سرپرست وزیر د هېواد د نوموتي قاري مرحوم برکت الله سلیم له کورنۍ سره غمرازي وکړه
د اوبو او انرژي سرپرست وزیر محترم الحاج ملا عبداللطیف منصور د هېواد د نوموتي قاري مرحوم برکت الله سلیم د وفات له کبله د هغه له کورنۍ سره د خواخوږي څرګندولو په موخه د هغه کور ته ولاړ او دده مشر ورور او خپلوانو ته یې د تسلیت مراتب وړاندې کړل.
د اوبو او انرژي سرپرست وزیر د مرحوم قاري برکت الله سلیم له خدمتونو څخه ستاینه وکړه او د هغه مړینه یې د هېواد لپاره یوه ستره ضایعه وبلله او زیاته یې کړه، چې دا تشه به ژر ډکه نشي.
د اوبو او انرژي سرپرست وزیر د لوي خدای(ج) له دربار څخه مرحوم قاري برکت الله سلیم ته د فردوس جنت او کورنۍ ته یې د جمیل صبر، جزیل اجر او نعم البدل غوښتنه وکړه.
