د اوبو او انرژي سرپرست وزیر د پکتیا ولایت له یو شمېر قومي مشرانو سره وکتل
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د پکتیا ولایت د مرکز، ګردیز اړوند د وچ غړک، څپړۍ او شیرین ګل کلیو له یو شمېر قومي مشرانو سره وکتل او په نوموړو کلیو کې د برېښنا رسونې پروژې د پلي کولو په هکله بحث او د اندونو تبادله وکړه.
په دغه لیدنه کې، د نوموړو کلیو قومي مشرانو په دغو کلیو کې د برېښنا رسونې پروژې د پلي کولو غوښتنه د اوبو او انرژي له سرپرست وزیر سره شریکه کړه.
په ورته مهال، د اوبو او انرژي سرپرست وزیر د نوموړو کلیو قومي مشرانو ته ډاډ ورکړ، چې په نوموړو کلیو کې به د برېښنا رسونې پروژه د دغه وزارت د روان لمریز مالي کال په منځني بودجې کې شامله او د بودجې او امکاناتو په چمتو کېدو سره به پلي شي.
له بلې خوا، د اوبو او انرژي سرپرست وزیر د جوزجان ولایت د خم آب او قرقین کلیو له مشرانو سره په لیدنه کې هغوی ته ډاډ ورکړ، چې د هغوی کلیو ته به د برېښنا رسونې په برخه کې رسیدګي وشي.
