د اوبو او انرژي سرپرست وزیر د چینایي یلو ریور شرکت له مسؤلینو سره د همغږي په یوه ناسته کې په شبرغان کې د ګازو له سرچینو څخه د ۳۰۰ میګاواټه برېښنا د تولید د پروژې د چارو پر چټکتیا باندې ټینګار وکړ
د اوبو او انرژي سرپرست وزیر محترم الحاج ملا عبداللطیف منصور د چینایي یلو ریور شرکت له مسؤلینو سره د همغږي په یوه ناسته کې په شبرغان کې د ګازو له سرچینو څخه د ۳۰۰ میګاواټه برېښنا د تولید په پروژه کې د پانګونې د چارو د پرمختګ وضعیت تر ارزونې لاندې ونیو او د پانګونې د چارو پر چټکتیا او د عملي چارو د پيل په هکله یې بحث او د اندونو تبادله وکړه.
د اوبو او انرژي سرپرست وزیر د ناستې په بهیر کې د دغې پروژې ارزښت ته په اشارې سره د نوموړي شرکت مسؤلینو ته د دغه وزارت د همکاري په برخه کې د عملي چارو د چټکتیا په برخه کې ډاډ ورکړ او ټینګار یې وکړ، چې ډېر ژر دې له کانونو او پټرولیم وزارت سره اړینه همغږۍ رامنځته او د پروژې عملي چارې دې ډېر ژر پيل شي.
