د اوبو او انرژي سرپرست وزیر د یوه هالنډي شرکت له مسؤلینو سره د ځمکې له تودخې څخه د برېښنا د تولید په هکله بحث او د اندونو تبادله وکړه
د اوبو او انرژي سرپرست وزیر محترم الحاج ملا عبداللطیف منصور د تي، وي، سي – یونایټید شرکت له مسؤلینو سره وکتل او د انرژي د تولید په پروژو کې د پانګونې په هکله خبرې، اترې وکړې.
په دغه لیدنه کې، د نوموړي شرکت مسؤلینو وویل، ليواله دي چې له نوي ټکنالوژيو څخه په ګټې اخیستنې سره د ځمکې د تودخې له سرچینې څخه د برېښنا د تولید په پروژه کې پانګونه وکړي.
د اوبو او انرژي سرپرست وزیر د نوموړي شرکت د مسؤلینو د لېوالتیا هرکلي وکړ او له دوی ته یې د دغه وزارت د همکاري په هکله ډاډ ورکړ او ټینګار یې وکړ، چې د پانګونې لپاره د زمینې د چمتو کولو او د پروژې د پلي کولو په موخه دې د وزارت له تخنیکي ټیم سره اړینې ارزونې ترسره کړي؛ د اړینو ارزونو او هوکړو د ترسره کولو وروسته به د دواړو لورو ترمنځ د همکاري هوکړه لیک لاسلیک شي؛ ترڅو د هغه سره سم نور اقدامات ترسره شي.
