د اوبو او انرژي وزارت، کانونو او پطرولیم وزارت او تویار صنعتي شرکت ترمنځ د مس عینک "2"پروژې د اوبو چمتو کولو په موخه د همغږۍ ناسته ترسره شوه
د اوبو او انرژي وزارت د اوبو معین محترم مجیب الرحمن عمر آخندزاده د خپل کار په دفتر کې د کانونو او پطرولیم وزارت د مس عینک پروژې له رئیس محترم انجنیر حمیدالله حبیبي او د تویار صنعتي شرکت له مسئولینو سره وکتل او د مس عینک "2" پروژې لپاره د اوبو سرچینو د پیژندنې او د اوبو رسولو د څرنګوالي په هکله بحث او د اندونو تبادله وکړه.
په دغه لیدنه کې د اوبو معین نوموړې پروژې ته د اوبو رسولو په برخه کې ددغه وزارت له لوري د همکاري ډاډ ورکړ او د قراردادي شرکت له مسئولینو څخه یې وغوښتل، چې د خپل اړتیا وړ اوبو کچه دې مشخصه کړي ترڅو د اوبو او انرژي وزارت ددوی د اړتیاوو پر بنسټ خپل لنډمهاله او اوږدمهاله پلانونه چمتو کړي.
همدارنګه، د غونډې په پای کې د تخنیکي مسئولینو تر منځ د همکاریو پر دوام او د معلوماتو پر شریکولو باندې هوکړه وشوه او د چارو د پرمخ وړلو په موخه پر ګډو همکاریو باندې ټینګار وشو.
