د اوبو او انرژي وزارت د اوبو معینیت په تخنیکي ناسته کې په کابل کې د ځمکې لاندې اوبو د وضعیت او څو نورو مهمو موضوعګانو باندې بحث او د نظر تبادله وشوه او لازم تصمیمونه ونیول شول
دا ناسته، د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده تر رهبري لاندې د ټولو مرکزي رئيسانو، آمرینو، انجنیرانو او د اوبو سکتور ټولو مسؤولینو په ګډون ترسره شوه.
په دې ناسته کې، د مهمو او ضروري موضوعګانو په هکله لکه: د بشري مرستو له لارې د GIZ موسسې په همکاري د هغو پروژو معلوماتو شریکول چې ټاکل شوي ده پلي شی، په کابل کې د ځمکې لاندې اوبو وضعیت او د مدیریت لپاره یې د مناسبې لارې عملي کول او د اوبو مدیریت اړوند یو شمېر نورو موضوعګانو باندې بحث او د نظر تبادله وشوه.
په دغه ناسته کې، د ځمکې لاندې اوبو سرچینو رئيس ښاغلي انجنیر عزیزالرحمن عزیز په کابل کې د ځمکې لاندې اوبو د وضعیت په هکله پرزنتیشن وړاندې کړ او د ځمکې لاندې اوبو د مدیریت لپاره یې څو سناریو ګانې له ګډون والو سره شریکې کړې.
د دې ناستې په دوام کې، یو شمېر رئيسانو او کارکوونکو په خپل وار سره په کابل کې د ځمکې لاندې اوبو وضعیت د اندیښنې وړ وبلل او د مدیریت په هکله یې په ناستې کې خپل نظرونه بیان کړل.
د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده د موضوعګانو تر هر اړخیزې څېړلو وروسته، د کابل اوبو د مدیریت په برخه کې د لازمو تصمیمونو په نیولو باندې ټینګار وکړ.
