د اوبو او انرژي وزارت د اوبو معین او د خوړو نړیوال سازمان د استازو تر منځ ګډه ناسته
دا ګډه ناسته د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده ، د خوړو نړیوال سازمان (WFP )د استازو او د وزارت د پروګرامونو د انسجام د رئيس په ګډون ترسره شوه.
په دې ناسته کې، د اوبو او انرژي وزارت د اوبو معین او د خوړو نړیوال سازمان د استازو ترمنځ د اوبو د سرچینو پروژو د پلي کیدو د مدیریت په هکله د ګډو همکاریو لکه د اوبو رسولو د کانالونو د جوړولو او بیارغونې او د اوبو لګولو او رسولو د سیستم پیاوړتیا باندې بحث او د نظر تبادله وشوه.
د اوبو او انرژي وزارت د اوبو معین ښاغلي انجنیر مجیب الرحمن عمر په دغه ناسته کې د اوبو د مدیریت د پروژو په پلي کیدو کې د خوړو نړیوال سازمان له همکاریو څخه مننه وکړه او د دې همکاریو د دوام غوښتنه یې وکړه.
ښاغلي عمر په خپلو خبرو کې د خوړو نړیوال سازمان همکاري د هیواد د اوبو سرچینو په مدیریت کې اړینه وبلله او د دې همکاریو پر لا همغږي، لومړیتوب او پراختیا باندي ټینګار وکړ.
په ورته وخت کې، په افغانستان کې د WFP استازو د خپلو همکاریو د دوام په اړه د دې وزارت معین ته ډاډ ورکړ.
د یادولو وړ ده، چې تر اوسه پورې د دې وزارت ډیرې پروژې د خوړو نړیوال سازمان له لوري په بیلابیلو ولایتونو کې پلي شوي او د افغانستان ډیری وګړي له دې پروژو څخه برخمن شوي دي.
