د اوبو او انرژي وزارت د اوبو معین د ننګرهار پوهنتون د انجنیري پوهنځي له رئيس او ښوونکو سره وکتل
د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده د خپل کاري سفر په دوام د ننګرهار پوهنتون د انجنیري پوهنځي له رئيس او ښوونکو سره وکتل او د یاد پوهنځي د ښوونکو ، زده کړیالانو او د اوبو او انرژي وزارت ترمنځ پر ګډې همکاري باندې بحث او د نظر تبادله وکړه.
په یاده لیدنه کې، د انجنیري پوهنځي رئيس او ښوونکو د اوبو له ښاغلي معین څخه وغوښتل چې د یاد پوهنځي د ښوونکو ، زده کړیالانو او د اوبو او انرژي وزارت ترمنځ ګډه همکاري رامنځته شي، ترڅو د یاد وزارت په اډانه کې زده کړیالانو ته د عملي او څېړنیزو زده کړو زمینه برابره شي.
په ورته مهال، د اوبو ښاغلي معین له دوی سره د هر راز همکاري ژمنه وکړه او له ښوونکو څخه یې وغوښتل چې له دوی سره خپلې تخنیکي او مسلکي مشورې شریکې کړي.
