د اوبو او انرژي وزارت د اوبو معین د هلمند د سیندیزې حوزې د عمومي ریاست کړنې وارزولې
محترم انجنیر مجیب الرحمن "عمر" د اوبو او انرژي وزارت د اوبو معین هلمند ولایت ته د خپل سفر په ترڅ کې د دغه وزارت د یو شمېر مرکزي رئیسانو او مسئولینو په ملتیا د هلمند د سیندیزې حوزې له عمومي رئیس ښاغلي قاري عبدالهادي، د هلمند د فرعي سیندیزې حوزې له رئیس مولوي قایم او د یادې سیندیزې حوزې له ټولو رئیسانو او کارمندانو سره لیدنه وکړه.
ښاغلي معین په دغه لیدنه کې د هلمند د سیندیزې حوزې عمومي ریاست د فعالیتونو د راپور تر ارزولو وروسته د ستونځو د حل او راتلونکي کال لپاره د پلان چمتو کولو په هکله لازمې لارښوونې وکړې.ښاغلي "عمر" د خپلو خبرو په ترڅ کې د اوبو د مدیریت اهمیت ته په اشارې سره د سیندیزې حوزې له ټولو مسئولینو څخه وغوښتل چې په ټوله سیندیزه حوزه کې د اوبو مدیریت لپاره خپلې ټولې هڅې په کار واچوي.
په ورته وخت کې د یادې حوزې مسئولینو خپلې ستونزې او وړاندیزونه له ښاغلي معین صاحب سره شریکې کړې او په ښه ډول سره د خپلو دندو او مسئولیتونو د تر سره کولو په هکله یې ډاډ ورکړ.
