د اوبو او انرژي وزارت د برېښنا مارکیټ حقوقي رئيس د سرپل له والي سره وکتل.
د اوبو او انرژي وزارت د برېښنا مارکیټ حقوقي رئيس محترم الحاج محمد حارث زرمتي او ورسره مل ټیم د سرپل له والي محترم الحاج محمد یعقوب عبدالرحمن اکه سره وکتل او د برېښنا د پروسې د ورکړي او پر هغه شرکتونو باندې چې په دغه ولایت کې د برېښنا د تولید او وېش په برخه کې فعالیت کوي د برېښنا انرژي د قانون د پلي کولو په هکله خبرې، اترې وکړې.
په دغه لیدنه کې، د برېښنا مارکیټ حقوقي رئيس وویل چې په هېواد کې د برېښنا تنظیم او د کمیت او کیفیت تضمین د برېښنا خدمتونو د تنظیم د عمومي ریاست له وظیفوي صلاحیتونو واکونو څخه دی او دغه ولایت ته د خپل سفر موخه د برېښنا رسونې شرکتونو ارزونه او پېژندنه وبلله.
د سرپل والي د اوبو او انرژي وزارت لېږل شوي پلاوي ته د ښه راغلاست ترڅنګ وویل، له شکه پرته په هېواد کې د برېښنا رسونې شرکتونو ثبت او راجستر کولای شي چې په افغانستان کې په یوه عایداتي سرچینې بدله شي او د سرپل ولایت رهبري د شرکتونو د ثبت او راجستر په برخه کې هر اړخیزه همکاري کوي.
همدارنګه، د اوبو او انرژي وزارت لېږل شوی پلاوی او ورسره مل د سرپل ولایت د ښاروالي، صنعت او سوداګري او برېښنا مسؤلینو د بېلګې په توګه د سرپل په ښار کې د یو شمېر مارکیټونو څخه لیدنه وکړه او ځینې مارکیټونو چې جنراتوري او سولري سیسټمونه درلودل ورته سپارښتنه وشوه چې ډېر ژر دې خپل سولري او جنراتوري سیسټمونه قانوني کړي او د اوبو او انرژي له وزارت څخه د فعالیت جواز تر لاسه کړي.
په پای کې د سرپل ولایت د نوموړو ریاستونو مسؤلینو د اوبو او انرژي وزارت له لېږل شوي پلاوي سره ژمنه وکړه که چېرې په سرپل ښار او ولسوالیو کې جنراتوري شبکې یا اوبیزې او سولري سیسټمونه یې ترسترګو شي ورته به د قانوني کېدو سپارښتنه وکړي.
