د اوبو او انرژي وزارت د رهبري مقاماتو د لغمان ولايت د شاهي کانال د پروژې په هکله د هغه ولايت له والي سره خبرې وکړې
د اوبو او انرژي وزارت سرپرست وزير محترم ملا عبداللطيف منصور او د دې وزارت د انرژي معين محترم ملا عبدالقاهر ادريس د لغمان ولايت له والي محترم قاري زين العابدين عابد او د هغه ولايت له يو شمېر سيمه ييزو مسئولينو سره وکتل.
په دې ليدنه کې، د لغمان والي د اوبو او انرژي وزارت د رهبري مقام څخه د شاهي کانال پروژې ته د دوى د پاملرنې په پار قدردانۍ او مننه وکړه او د يادې پروژې د عملي چارو د پيل لپاره يې د لا زياتي همکاري غوښتنه وکړه.
د اوبو او انرژي وزارت سرپرست وزير د لغمان والي ته ډاډ ورکړ چې ياده پروژه د هغې د اساسي او عامو ګټو په پار د اوبو او انرژي وزارت د کارونو په لومړيتوب کې ده او عملي چارې به يې هم په راتلونکي کې د پراختيايي بودجې تر منظورېدو وروسته پيل شي.
همدارنګه د اوبو او انرژي وزارت سرپرست وزیر د خپلو خبرو په دوام کې وویل چې د پراختیایي بودجې د کمښت په صورت کې بیا هم د اوبو او انرژي وزارت د رهبري مقام هڅه کوي چې په دې پروژه کې د پانګونې زمینه چمتو کړي.
