د اوبو او انرژي وزارت سرپرست: د دولت، خصوصي او عامه سکتور ګډ همکاری د انرژي په سکتور کې هیواد په ځان بسیا کړي
د تدارکاتو د پروسې او د انرژي تولیدولو په پروژو کې د خصوصي سکتور پانګونې پوهاوي برنامه د افغانستان د نوي کیدونکي انرژۍ اتحادیې لخوا د چهارشنبه ورځ د لیندی په ۶ نیټه د اوبو او انرژي وزارت سرپرست ښاغلی انجنیر محمد گل خُلمی او د اتحادیې غړو په ګډون په حضور سره د اوبو او انرژي وزارت په عمومي تالار کې ترسره شو.
د نوي کیدونکي انرژۍ اتحادیې په استازیتوب ښاغلی نجیب الرحمان صبوری وویل، د دې برنامې موخه د خصوصي سکتور ته د انرژي تولید پروژې خبرول او د برخه اخیستونکو ترمینځ د معلوماتو او خبرو اترو د زمینه رامنځته کول دی.
د اوبو او انرژي وزارت سرپرست ښاغلی انجنیر محمد گل خُلمی د نوي کیدونکي انرژۍ اتحادیې د فعالیتونو څخه ستاینه وکړه او په افغانستان کې د انرژۍ د ودې او پراختیا په برخه کې خصوصي او عامه سکتور ګډ همکاری اړین وبلله.
همدارنګه ښاغلی خُلمی د شبرغان طبیعي ګازو څخه د انرژي تولید، د کندهار ۳۰ میګاواټه سولری برښنا د پروژو په بشپړیدو او په هرات ولایت کې د ۲۵ میګاواټه بادی برښنا د تړون لاسلیک کیدو څخه یادونه وکړه او د انرژي تولید په پروژو کې د خصوصي سکتور پانګونه او په افغانستان کې د انرژۍ بازار په سیالۍ کولو باندی ټینګار وکړ.
د یادونې وړ ده چې شاوخوا ۸۰ شرکتونه د افغانستان د نوي کیدونکي انرژۍ اتحادیې غړي دي، چې په افغانستان کې د انرژۍ تولید ته وده ورکولو لپاره کار کوي.
