د اوبو او انرژي وزارت سرپرست وزیر، د اقتصاد وزارت سرپرست وزیر او د ترکیې هېواد سفیر ګډه ناسته ترسره کړه
دا ناسته د اوبو او انرژي وزارت د سرپرست وزیر ښاغلي ملا عبداللطیف منصور، د اقتصاد وزارت د سرپرست وزیر ښاغلي قاري دین محمد حنیف او د ترکیې هېواد سفیر ښاغلي جهاد ارګینای په ګډون ترسره شوه.
یاده ناسته چې د هلمند ولایت د کجکي بند په ساحه کې ترسره شوې وه، درې واړه لورو په پیل کې د کجکي بند د دوهم فاز پلي کول او د دې سترې پروژې د پرانیستې په مناسبت یو بل ته او د افغانستان ټول ملت ته مبارکي وړاندې کړه.
د یادې ناستې په دوام کې، د اوبو او انرژي وزارت سرپرست وزیر د ترکیې هېواد د همکاریو د قدردانۍ ترڅنګ د دې همکاریو د دوام غوښتنه وکړه او د عامه المنفعه پروژو د عملي کولو لپاره یې په لازیاتو ګډو همکاریو باندې ټینګار وکړ.
د ناستې په دوام کې، د اقتصاد وزارت سرپرست وزیر هم د دواړو هېوادونو ترمنځ د ګډو همکارویو د اهمیت په هکله خبرې وکړي او په افغانستان کې د اقتصادي پروګرامونو د پلي کولو په برخه کې يې له ترکیې هېواد څخه د لازیاتو همکاریو غوښتنه وکړه.
په ورته وخت کې، د ترکیې سفیر د کجکي بند د ۱۰۰ میګاواټه برېښنا د تولید د دستګاه د کار په بریالیتوب د خوښۍ په څرګندولو سره په افغانستان کې د عامه المنفعه پروژو د پلي کولو او د اقتصادي پراختیا د پروګرامونو د پلي کولو په برخه کې د لا زیاتو همکاریو ژمنه وکړه.
