د اوبو او انرژي په وزارت کې د امر باالمعروف او نهي عن المنکر قانون تشریح شو
د افغانستان د اسلامي امارت د امر باالمعروف، نهي عن المنکر او شکایتونو اورېدلو وزارت د شکایتونو اورېدلو معین محترم شیخ صدیق الله او ورسره مل د هغه وزارت ستر سلاکار محترم مولوي محمد طاهر انوري د اوبو او انرژي وزارت ته راغلي وو او د ماسپښین تر لمانځه وروسته یې په داسې حال کې چې ټولو رئیسانو او کارمندانو ګډون درلود، د امر باالمعروف او نهي عن المنکر قانون د پېژندنې په هکله خبرې وکړې او ټول کارمندان یې رعایتولو ته وهڅول.
هغه د دغه قانون موخې د ټولنې اصلاح او په افغانستان کې د دیني او معنوي زده کړو وده وبلل او ټینګار یې وکړ، چې د دغه قانون عملي کول د ټولنې د ټولو وګړو په خیر او صلاح به وي.
هغه همدارنګه د اوبو او انرژي وزارت د ټولو رئيسانو او کارمندانو څخه وغوښتل، چې د دعوت او ارشاد له مسؤلینو او مبلغینو سره په ښه توګه همکاري وکړي او په خپل ورځني ژوند کې د اسلام سپیڅلي دین او نبوي سنت باندې عمل وکړي.
