د اوبو پر سرچینو باندې د اقلیمي اغېزو د پوهاوي ورکولو سمینار د اوبو او انرژي وزارت د اوبومعین په شتون کې تر سره شو
دا سمینار د افغانستان د هایدرولوژي ملي کمېټې لخوا د یونسکو او آیسیسکو د دفترونو په مالي ملاتړ د عامه پوهاوي په موخه د کابل حبیبیې لېسي کې ترسره شو، چې د ۱۷ ښوونځیو، ۶۰ ښوونکو پکي ګډون کړي وو.
د اوبو او انرژي وزارت د اوبو معین ښاغلي انجنیر مجیب الرحمن عمر وویل، چې د دغه پروګرام د ترسره کولو موخه په افغانستان کې د اوبو د سرچینو د وضعیت په اړه د خلکو د پوهاوي لوړول او د اوبو سپمولو ته د خلکو هڅول دي.
ښاغلي عمر په خپلو خبرو کې د دغه پروګرام له ټولو تنظیموونکو او د یونسکو او آیسیسکو له دفترونو څخه مننه وکړه او د اوبو پر سرچینو یې د اقلیم د بدلون اغیزو ته په اشارې سره د دغو پروګرامونو ترسره کول مهم او ګټور وبلل.
د اوبو او انرژي وزارت معین همدا راز د اوبو سپما او د اوبو د سرچینو مدیریت د ټولو افغانانو ملی او ایماني دنده وباله او ویې ویل، د اوبو او انرژي وزارت رهبري په هیواد کې د اوبو مدیریت خپل تر ټولو مهم مسوولیت ګڼی او د دې مهم مسؤلیت په سرته رسولو کې شپه او ورځ هڅه کوي چې په عملي توګه مهم او اغېزمن ګامونه پورته کړي
د دغه سیمینار په دوام کې د اوبو د منابعو عمومي رئیس انجنیر فیض الرحمن عزیزي او د اوبو د ملي کمیټې یو شمیر نورو غړو، د حبیبیې لیسې مرستیال او د یونسکو او آیسیسکو استازو هر یو د سیمینار په موخو خبرې وکړې او د اوبو د منابعو وضعیت، په منابعو د اقلیم د بدلون اغیزې، د اوبو اهمیت او د اوبو د سپمولو او مدیریت لپاره د عامه پوهاوي د پروګرامونو په اړه بحث او پریزنټیشنونه ګډونوالو ته وړاندې کړل.
دا په داسي حال کې ده، چې پرون دا سمینار د شپږمي ښوونېزې حوزې۵۰ ښوونکو ته د۱۶ لیسو لپاره ترسره او همدارنګه ټاکل شوې ده چې سبا دا سمینار د عبدالعلي مستغني په لېسه کې ترسره شي.
