د برېښنا مارکیټ تخنیکي رئيس او مل پلاوي د کاپیسا له والي سره وکتل
د اوبو او انرژي وزارت د انرژي معینیت د برېښنا مارکیټ تخنیکي رئيس محترم انجنیر همتالله امینزي او مل پلاوي کاپيسا ولایت ته د سفر په ترڅ کې د کاپیسا د اوبو او انرژي د رئيس محترم انجنیر کاوه خروش په ملتیا د کاپیسا له والي محترم قاري احسانالله بریال سره وکتل.
په دغه لیدنه کې، نوموړي پلاوي د کاپیسا له والي سره د برېښنا د ښه تنظیم، د فعالو شرکتونو د پېژندنې او د هغوی د فعالیتونو د ارزونې له لارې د نوموړو شرکتونو د فعالیتونو د قانونيکولو، د تخنیکي خوندیتوب د مراعتولو او د انرژي په سکتور کې د متشبثینو د هڅونې په هکله هر اړخیز معلومات وړاندې کړل.
همدارنګه، نوموړي پلاوي د کاپیسا له والي څخه وغوښتل چې نوموړي موضوع دې د ولایت په اداري ناسته کې هم مطرح شي، ترڅو د ولایت له آدرسه ټولو اړوندو ادارو ته ورسول شي.
په ورته مهال، د کاپیسا والي نوموړي پلاوي ته ډاډ ورکړ، چې په دې برخه کې به هېڅ ډول هڅه او کوښښ ونهسپموي.
له بلې خوا، د کاپیسا ولایت په مرکز کې د انرژي کمېټې درېیمه ناسته د کاپیسا د اوبو او انرژي ریاست تر مشري لاندې د دغې کمېټې د غړو او د وزارت د برېښنا مارکیټ د تخنیکي رئيس او مل پلاوي په شتون کې ترسره شوه.
په دغه ناسته کې په کاپیسا ولایت کې د برېښنا رسونې په برخه کې د فعالو شرکتونو پېژندنه، د هغوی د فعالیتونو ارزونه او د رسمي جواز د تر لاسه کولو او د قانون په چوکاټ کې د ثبت او راجستر پروسې عملي کولو، د برېښنا اغېزمن تنظیم، د برېښنا د نشتوالي ستونزو د حل لارو، چارو او د برېښنا رسوني اړوند یو شمېر نورو موضوعاتو په هکله بحث او د اندونو تبادله وشوه.
