د سترو قراردادونو د څېړنې د رهبري پلاوي ناسته ترسره شوه
د سترو قراردادونو د څېړلو د تېرو ناستو په دوام، یاده ناسته د اوبو او انرژي وزارت د سرپرست وزیر ښاغلي ملا عبداللطیف منصور، د کلیو پراختیا وزارت سرپرست وزیر ښاغلي ملا محمد یونس آخندزاده، د اقتصاد، مالیې، ټولګټو وزارتونو دمعینانو او تدارکاتو ملي ادارې د استازي په ګدون ترسره شوه.
په دې ناسته کې د پنجشیر د پرنده اوبو د کوچني بند پروژې، د کندهار ولایت په ارغستان کې د لورې بند د پروژې د امکان سنجي مطالعاتو د پروژې قرارداد او یو شمېر نور ستر قراردادونه تر مطالعې او څېړنې لاندې ونیول شول.
د ناستې په بهبر کې د څېړونکي پلاوي غړو د یادو قراردادونو په هکله بحث او د نظر تبادله وکړه او د اړینو څېړنو له ترسره کولو وروسته، خپل وړاندیزونه د قراردادونو د عمومي څېړنې په راپور کې شامل کړل.
