د غور ولایت په شهرک ولسوالي کې د تنګي دهن منارې چکډم پروژه ګټې اخیستنې ته وسپارل شوه
د غور ولایت په شهرک ولسوالي کې د تنګي دهن منارې چکډم پروژه د ولسوالي مسؤولینو، د نوموړې سیندیزې حوزې تخنیکي ټیم او قومي مشرانو په شتون کې ګټې اخیستنې ته وسپارل شوه.
د نوموړي چکډم چارې د اوبو او انرژي وزارت له پراختیایي بودجې څخه، د غور سیندیزې فرعي حوزې تر څارنې لاندې د 3 میلیونه 300 زرو افغانیو په لګښت د یوه کورني شرکت له لورې بشپړې شوي.
دغه چکډم د سېلابونو د مخنیوي او د هغه د خطرونو د کموالي، د موسمي اوبو د راټولولو او د ځمکې لاندې اوبو د تغذیه کولو په موخه جوړ شوی، چې د 12500 مترمکعبه اوبو د ذخیره کولو ظرفیت لري او څه باندې 350 کورنۍ به ترې ګټه واخلي.
