د موسی قلعه برېښنا بند او د هلمند نهر سراج کانال په اړه
جمهوررئیس: مالیې وزارت دې د راتلونکي کال بودجه کې د موسی قلعه برېښنا بند او د هلمند نهر سراج کانال ته لومړیتوب ورکړي
د افغانستان د اسلامي جمهوریت د جمهوررئیس محمد اشرف غني په مشرۍ د اقتصادي عالي شورا غونډې کې د کجکي بند د دویم فاز پروژې د ارزونې په اړه نن له غرمې مخکې په ارګ کې بحث وشو.
په دغه غونډه کې د اوبو د چارو د تنظیم ملي ادارې عمومي رئیس خان محمد تکل د کجکي بند د دویم فاز پروژې د وضعیت راپور وړاندې کړ وې ویل"تر اوسه د دې پروژې شل سلنه عملي او د تفصیلي پروژې د ډيزاین ۶۵ سلنه چارې ترسره شوي."
جمهوررئیس د هغوئ د نظریاتو تر اورېدو وروسته پرېکړه وکړه چې یو بې طرفه پلاوی دې د کجکي د برېښنا بند د دویم فاز پروژې د تخنیکي ډیزاین ارزونه وکړي، همداراز د جمهوري ریاست عالي مقام ارشد مشاوریت ته یې دنده وسپارله چې په دې برخه کې د اسنادو سوابقو ته په پام د نړیوال بانک د شرایطو په اړه له بین المللي سلاکارانو څخه هم مشوره واخلي او راپور یې د اقتصادي عالي شورا راتلونکې غونډې ته وړاندې کړي.
همداراز جمهوررئیس د اوبو چارو د تنظیم ملي اداره موظفه کړه چې د موسی قلعه او د هلمند د نهرسراج کانال په اړه خپل بنسټیز مطالعات ترسره او مالیې وزارت دې له دې ادارې سره په همغږۍ د راتلونکي کال په بودجه کې د موسی قلعه برېښنا بند او د هلمند ولایت نهر سراج کانال ته لومړیتوب ورکړي.
