د میدان وردګ ولایت په جغتو ولسوالي کې د ١١ سوه متره په اوږدوالي د اوبو کانال د جوړولو چارې پیل شوې.
د میدان وردګ ولایت په جغتو ولسوالي کې د اوبو کانال د رغولو چارې پیل شوې
یاد کانال د اېف، اې، او مؤسسې په مالي لګښت د میدان وردګ سیندیزې فرعي حوزې تر څارنې لاندې د ٩١ زره ۶۷۵ امریکایي ډالرو په لګښت جوړېږي، چې زرګونه جریبه ځمکه به خړوبه کړي.
د دغې پروژې په پرانیست غونډه کې د میدان وردګ سیندیزې فرعي حوزې رئیس مولوي عبدالصمد حلیم، د ولایت مقام د دفتر رئيس مفتي ضابط حارث، د اقتصاد رئيس مولوي عبدالحکيم حامد، د جغتو ولسوال مولوي بهرام ګل حنفي او ګڼ شمېر سیمه اییزو خلکو ګډون کړی وو.
یادو چارواکو دغه شان پروژې د خلکو د اقتصادي پیاوړتیا لپاره اغیزمنې وبللې او زیاته یې کړه چې د اسلامي امارت په راتګ سره په هېواد کې ګڼ شمېر لویې او وړې پروژې پلي شوي چې زرګونه خلک پکې په کار بوخت دي.
د یادولو وړ ده چې تېره اونۍ د یاد ولایت د سید آباد ولسوالي په تنګي دره کې د استنادي دېوال د جوړېدو لویې پروژې د بنسټ ډبره هم کېښودل شوه.
