د میدان ښار فرعي سیندیزې حوزې نوی ټاکل شوی رئيس همکارانو ته ور وپېژندل شو
د میدان ښار فرعي سیندیزې حوزې نوی ټاکل شوی رئيس ښاغلي مولوي عبدالصمد حلیم د یوې غونډې په ترڅ کې د کابل سیندیزې حوزې عمومي رئيس ښاغلي انجنیر حبیب الرحمن حقپال او د اوبو او انرژي وزارت د اوبولګولو، اوبو رسولو او کانالیزسیون رئيس ښاغلي انجنیر محمد اسماعیل عمار له خوا د دې وزارت د یو شمېر نورو مسؤلینو په ګډون همکارانو ته ور وپېژندل شو.
یاده دې وي چې ښاغلي مولوي صاحب عبدالصمد حلیم د ا.ا.ا په تېره دوره کې د کابل د نړیوال هوایي ډګر د ګمرګ درئيس او د کابل ګمرګ د صادراتو د رئيس په توګه دندې ترسره کړې دي. دغه راز د ناټو د اشغال په کلونو کې نوموړي د شهید مولوي صاحب نصرالله منصور د دارالحفاظ د مهتمم او د شهید منصور صاحب د جامع جومات د خطیب او د زرمت ولسوالي د فقهي مجلس د غړي په حیث او د ولس په منځ کې د جزایي او حقوقي مسایلو د حل او فصل په برخه کې د یوه دیني عالم او مصلح په توګه خدمتونه ترسره کړې دي.
