د چینایي شرکتونو یوې ډلې د ډبرو سکرو له سرچینو څخه د برېښنا تولید او د برېښنا تولید بندونو د جوړولو په پروژو کې پانګونې ته لېوالتیا څرکنده کړه
د اوبو او انرژي وزارت د پانګونې د جلب او جذب رئيس محترم مولوي رحمتولي رحماني د دغه ریاست د یو شمېر تخنیکي مسؤلینو په شتون کې د چینایي شرکتونو له یوې ډلې سره وکتل او په افغانستان کې د برېښنا انرژي تولید په پروژو کې د پانګونې په هکله بحث او د اندونو تبادله وکړه.
په دغه لیدنه کې، د چینایي شرکتونو یوې ډلې په افغانستان کې د ډبرو سکرو له سرچینو څخه د برېښنا تولید او د برېښنا تولید بندونو د جوړولو په برخه کې د پانګونې په موخه لېوالتیا څرګنده او په دې هکله د همکاري غوښتنه وکړه.
په ورته مهال، د پانګونې د جلب او جذب رئيس په دغه لیدنه کې په افغانستان کې د برېښنا انرژي تولید په پروژو کې د چینایي شرکتونو د پانګونې د لېوالتیا هر کلی وکړ او زیاته یې کړه، چې اوس په افغانستان کې له هره پلوه د پانګونې لپاره زمینه چمتو شوې او مونږ په دې برخه کې ټولو کورنیو او بهرنیو پانګوالو ته د همکاري ډاډ ورکوو. ښاغلي رحماني په دغه لیدنه کې د پانګونې په برخه کې د عملي ګامونو په اخیستلو باندې ټینګار وکړ او زیاته یې کړه، چې په دې هکله به له نوموړو شرکتونو سره د پانګونې په موخه د بنسټیزو پروژو لست شریک شي.
