د کابل ښار د ځمکې لاندې اوبو د څارنیزې شبکې د څېړنې او سمون راپور په یوه پرزنټیشن کې د ځمکې لاندې اوبو سرچینو په ریاست کې وړاندې شو
د کابل ښار د ځمکې لاندې اوبو سرچینو د غوره څارنې او مدیریت په موخه د ځمکې لاندې اوبو سرچینو ریاست د کابل د اوبو او انرژي ریاست په همکاري یوه تخنیکي پلاوي ته دنده سپارلې وه، ترڅو د لسو کاري ورځو په ترڅ کې د کابل ښار په بېلابېلو سیمو کې د ځمکې لاندې اوبو سرچینو څارنیزې شبکې تر څېړنې او سمون لاندې راولې.
د دغې څېړنې د لاسته راوړنو له ډلې څخه کولای شو چې د ۸۲ کړیو څاګانو کورینات د سمون، د ۱۱ کړیو ستونزو لرونکو څاګانو لپاره د بدیل ټاکل، د ۱۵ کړیو بې اغېزې څاګانو حذفول، د ۵ کړیو څاګانو د ستونزې څېړل او هوارول او د سیمې له اړتیاوو سره سم د ۶۷ کړیو نوي څاګانو ټاکلو ته اشاره وکړو.
دغه اقدام د کابل ښار د اوبو سرچینو مدیریت د غورهوالي او د ځمکې لاندې اوبو پر وضعیت باندې د لا کره څارنې په موخه ترسره شوی دی.
