د کاپیسا ولایت د باغدرې بند د تخنیکي مطالعاتو د چټکتیا لپاره د همغږۍ ناسته ترسره شوه
د اوبو او انرژي سرپرست وزیر محترم الحاج ملا عبداللطیف منصور د اېم، جي، اې، اېم-اېم، سي، سي چینایي شرکت له مسؤول ښاغلي سونګ سره ولیدل. په دغه ناسته کې دواړو خواوو د باغدرې بند د تخنیکي مطالعاتو د پرمختګ او د چټکتیا د لارو چارو په هکله بحث او د اندونو تبادله وکړه.
دواړو خواوو د دغې پروژې د تخنیکي مطالعاتو د عملي کولو په پیل باندې خوښي وښوده او د وروستيو کړنو د ترسره کولو لپاره یې د هغه د چټکتیا په اهمیت باندې ټینګار وکړ.
د غونډې په بهیر کې د اوبو او انرژي سرپرست وزیر هغوی ته د نوموړي بند د مطالعاتو د چارو د پرمخ وړلو په برخه کې د دغه وزارت له لوري د اړینو همکاريو د ترسره کولو څخه ډاډ ورکړ.
له بلې خوا د نوموړي شرکت مسؤول هم د اوبو او انرژي وزارت د ملاتړ په ستایلو سره د دغهٔ وزارت په اړوندو پروژو کې د خپلې پانګونې د پراخولو لپاره ژمنه وکړه.
د یادونې وړ ده چې د اوبو او انرژي سرپرست وزیر څه موده وړاندې د کاپیسا ولایت د باغدرې بند سیمې ته د یو سفر په ترڅ کې د دغهٔ بند د تخنیکي مطالعاتو بهیر له نږدې څخه و ارزولو او د هغه پلي کول یې په هېواد کې د انرژي د پراختیا په برخه کې یو ارزښتمن ګام وبالهٔ.
