د یوه افغان سوداګریز شرکت مسؤلینو او د هغه چینایي شریکانو د انرژي او برېښنا د تولید بندونو په پروژو کې پانګونې ته لېوالتیا څرګنده کړه
د اوبو او انرژي وزارت د پانګونې د جذب رئيس محترم انجنیر دادمحمد زرمتي د خپل کار په دفتر کې د حسیب صفي عاشوري سوداګریز شرکت له مسؤلینو او د هغه له چینایي شریکانو سره وکتل.
په دغه لیدنه کې، د نوموړي شرکت مسؤلینو په افغانستان کې د بادي، لمریزې او د ډبرسکرو له سرچینو څخه د برېښنا انرژي او د برېښنا بندونو د تولید په پروژو کې پانګونې ته لېوالتیا څرګنده کړه.
د پانګونې د جذب رئيس په دغه لیدنه کې، د نوموړي شرکت مسؤلینو او چینایي شریکانو ته یې د هر ډول برېښنا انرژي او د برېښنا د تولید بندونو په پروژو کې پانګونې ته د زمینې د چمتو کولو په برخه کې د هر راز همکاري ډاډ ورکړ.
د یادونې وړ ده، چې په افغانستان کې د اسلامي امارت په بیا واکمنېدو سره د اوبو او انرژي د تولید په پروژو کې پانګونې ته د کورنیو او بهرینو شرکتونو لېوالتیا ډېره شوې ده.
